2021 Day 78

2021 Dedh Trei Ügens hag Etek

 

De Gwener, nawnjegves mis Meurth

Friday, 19th March

E'n gwelha pres, segh ew an jedh hedhyw. Ma'n ostyjy nei ow tos. En kensa, ma seher dû, lies sagh plastek dû, leun a na wor nagonan pandra marnas Duw. Lôwen ew an gath. Dar! Gwily nowydh! Ma cofers, kistednow, canstellow, basket dilhas (leun a dhilhas gleb dhe vos cregys emann), levrow, gwariellow. Hag oll an re ma ew heb còmpla an mebel en trònk-carr gwydn. Res veu dhen còrtos hedna. E veu othom a dhew dhen crev. Ass ew aga threys poos ha trosüs war agan planchens ha degrëys coth! An chei a gernas. Agan deuv a dherevas an gwily. War an diwedh benyn yonk ha meppik wheg eth dhe'n gwily.   

Fortunately, the day is dry today. Our guests are coming. Firstly, there are black bags, lots of black plastic bags, full of only God knows what. The cat is happy. Well! A new bed! There are chests, boxes, baskets, a clothes basket (full of wet clothes to be hung up), books, toys. And all these are without mentioning the furniture in a white lorry! We needed to wait for that. It needed two strong men. How heavy and noisy their feet were on our old wooden floors and stairs! The house shuddered. Our son-in-law built the bed. In the end a young woman and a sweet little boy went to bed.

 

Deg ger rag hedhyw: Ten words for today

canstellow baskets < canstel (f)

deuv (m) son-in-law

kerna ~ crena to shudder, tremble, shake

na wor nagonan marnas Duw God only knows

planchen (m) wooden floor

segh dry

seher bags < sagh (m)

treys feet < troos (m)

trònk-carr (m) lorry

trosüs noisy < tros (m)