Tabm a Gernow 67 (mining bees)

Otta Porthtowan en mis Gwedngala. Treth bian ew, bian ha trethek. Meurgerys ew en hav, da gen an bobel en awel vas, saw lebmyn gwag lowr ew. Ma aljow (alsyow) ha towednow oll adro ha ma kerdhoryon gen keun (gen keun ha heb keun) o kerres (kerdhes) war drolergh a'n als. 



Ma'n mor tid o moas mes ha gleb ew an treth. Nag eus den veth o neyja e'n dowr, saw ma gwithijy bownans whath. Ma frosow laber (strong currents) e'n mor en termyn trig (low tide).



Ma eythin ha grüg o tevy war an aljow. Pur vian ew an losow drefen boas an dor scant ha trethek, gen lies men, ha drefen boas an le gweskys gen an gwenjow e'wedh. Ma flourys melen dhe'n eythin whath, bes marow ew an flourys basom.




Ma idhyowen o tevy en ke reb lowarth chei. Ma lies flour warnedhy, ha war an flourys ma lies gwenen vian, bian ha üskis . Eus cawal gwenen en ogas? Nag eus, drefen boas an re ma gwenyn gwels, nag ens gwenyn mel. 



Pe le mons o triga? Pe le ma aga anedhow? Thens gwenyn balweyth. Rag hedna anjei ell palas en gweres (soil) trethek. Mons o cül kivorrow bian e'n dor. Ma tobmen reb an vorr. Perfeth ew rag an gwenyn ma. Etho, tòllek ew, leun a dollow. Ma üdn toll rag pub hüny.