Tabm a Gernow 28 (Trevellance)

Otta radn a vappa coth (1888). Whei ell gweles diw venten, jinjy, men coth, melin eskern ha teller manerjy. Pandr'ew obma lebmyn? Me a wra disqwedhes dhewgh.

En kensa, ottobma fenten e'n vorr, moy es cans bledhen diwettha. Pub bledhen ma hei o springya en kewer lawek. Segh ew hei e'n cres an hav. Ma'n treven war an mappa ewedh.

Thew an vownder goth ma an vorr dhe Trevellance. Nag ew hei pur vas rag kerry. Nag ew hei trulergh da naneyl. 



An maner a veu complys en kensa en 1303. Nag ew an manerjy obma lebmyn. Trevellance ew coth bes nag ewa manerjy. Thera tollow e'n vos rag termyn hir. Rag fra? Na oram. Martesen rag colomednow po skelly-grehednas.

Soweth nag üjens ena na fella. An chei a veu arnowythhys ha "gwellhys" namnygen!

Ma'n velin eskern reb an vorr (Bone Mill Road). Magor ew lebmyn, overdevys gen idhyow. Thew an perhen Arlòdh Falmeth. En termyn eus pasyes nebonan a venja gòberna an velin vel chei. Straft òja hedna y oberoryon a wrüg diswül an to. Lebmyn na alja nagonan triga etto.

Otta an jinjy. Wheal Chyverton Nowydh ew - saw nag ew nowydh lebmyn. Magor ew. (Ergh po rew? Hebma a veu en 2009.)

Pe le ma'n men coth? Martesen ma va war an rün a ügh dhe'n jinjy. Martesen kellys ew. Martesen thew ev overdevys gen spern. Pandr'ew hedna reb an ke? Alja ev boas men hir?