Tabm a Gernow 101 (Goodbye Ponsmere Hotel)

Ma’n fâss Tywarnheyl o treylya. En termyn eus passyes thera ostel meurgerys henwys Ponsmere Hotel. Teller o rag lies gool Lowender Peran. Saw coth ew an derevyans ha skith. Nag o herwydh an gis ha nag o erbisüs. War diwedh an ostel a veu gwerthys (òja eth bledhen "dhe wertha").

"Pandr'a wher?" nei a wrüg omwofen. Thera towlow rag eth ranjy warn ügens, üdnek chei ha dew ranjy a ûgh carrjyow. Magata e vedh üdn restaurant ha parkyans. En mis Ebrel 2015 an ostel a veu gwastys. Thera crana broas a ûgh an treven reb an glesin. Thera pal oll adro. Nag era ostel na fella. Düw geno whei Ponsmere.

Ma hanow nowydh, "The Dunes". Nag ew hanow Kernowek. Hedna via "An Tewednow". A vedh an anedhow rag teylüyow tüs whel a Gernow? Na vedh, heb dout a'n dra. An prisyow a vedh tredh dew gans mil pens ha hanter milvil pens. Tüs rych dhort Pow an Sowson a wra doas rag perna havosow teg, me a sòpposya.

En kensa thera men leur, nessa thera leur awoles. Ha òja hedna, tabm ha tabm, ma'n drehevyans o cressya. Whath ma'n crana obma. Ma odhom dhen a wortos bys dhe'n vledhen diw mil ha etek rag diwedh an treven nowydh.