2020 Day 275

 2020 Dedh Dew Cans Trei Ügens ha Pemdhek

De Yow, kensa mis Hedra

Thursday, 1st October

Ew da geno whei annedh a’n mes, po ew gwell bos trigys en tre po cita? Ma gwaynyow hag anlesow et an dhew. An whathow ew deffrans – ma moy a gerry e’n cita, bes terweythyow ma fler e’n gwelyow. Ello whei dismygya an peth eus e’n bernyow na war an gorwel? Kidnyadh ew, ha ma lies gweythres a dal bos gwres war vargen tir. An bernyow na a vedh lesys war an dor rag gwelha an gwelsowas. En gwettha pres, nag üjy an bernyow ma ow qwelha agan glesin! Eus pibow bystyon gwell e’n dre? Nebes pibow e’n pow ew coth – ha ma othom dhodhans a vos egerys terweythyow. An ebòrn e’n nos ew cler e’n pow (mars ew heb cloudys) - nag eus lies golow. Ma loor leun haneth, bes na ellama hy gweles – glaw a wra. En gwelha pres, my a gemeras foto newher. Thera cloudys hag y veu cabmdhavas adro dhe’n loor.

Do you like a rural dwelling, or is it better to be living in a town or a city? There are advantages and disadvantages in both. The whiffs are different – there are more cars in the city, but sometimes there is a stink in the fields. Can you guess the contents of those heaps on the horizon? It is autumn, and there are many jobs that should be done on a farm. Those heaps will be spread on the ground to improve the fertility. Unfortunately, these heaps do not improve our lawn! Are there better drains in the town? Some pipes in the country are old – and they need to be unblocked sometimes. The night sky in the country is clear (if it is cloudless) - there aren't lots of lights. There is a full moon tonight, but I can’t see it – it is raining. Fortunately, I took a photo last night. There were clouds and there was a rainbow round the moon.

Deg ger rag hedhyw: Ten words for today

a’n mes rural

an dhew both (m) ~ an dhiw (f)

anlesow disadvantages, drawbacks < (singular) anles (m)

dismygya to guess, work out

gorwel (m) horizon

gwaynyow advantages, gains < (singular) gwayn (m)

gwelsowas (m) fertility

lesa to spread > (verbal adjective) lesys

pibow bystyon sewers, drains

whathow whiffs, smells, fumes