Thursday 23 June 2016

Tabm a Gernow 55 (Pill family)

E’n vledhen etek cans üdnek ha dewgens thera trigys en Cocks,
tre pur vian en Lannberan, teylû henwys Pill. 
Robert Pill, dew ha dewgens y vloodh, o den bal en bal cober 
(martesen St. George war Clegar). Jane henwys o y wreg. 
Bloodh hei en 1851 o dewgens. Thera seyth flogh dhodhans. 
Mary Jane, pemdhek hy bloodh, o meteth bal. Thomasine aga 
nessa mergh, peswardhek hy bloodh, o meteth bal e’wedh. 
Elizabeth, dewdhek hy bloodh, o mos bal solabres. 
Trei mos bal e’n teylû. Thera mergh aral. Selina o re yonk 
dhe voas mos bal. Pemp bloodh o hei ha scolores.
Thera mebyon e’n teylû e’wedh: William (deg bloodh) ha 
Robert (eth bloodh). Thens arvethesigyon en bal cober e’wedh. 
An yonca mab o Thomas Henry, nag era bes whetek mis y vloodh.
An düs bal a wrüg obery dadn an dor. An mosy bal ha’n vebyon 
yonk o spalyoresow ha spalyoryon po lappyors. Anjei a wrüg 
crackya ha cronkya an stof, tabm ha tabm, dhe radnow bian 
rag an vog (smelting house).
Otta Cocks hedhyw.

Deg bledhen òja hedna thera an teylû trigys en Cocks whath, 
bes lebmyn tho Robert tas, William ha Robert mab stenoryon. 
Thera Mary Jane, Elizabeth ha Selina trigys ganjans, oll 
andhemedhys. Pe le era Thomasine? Thera hei en ogas. 
Tho hei demedhys, dhe John Bawden, den bal, ha gen trei flogh
solabres.
En etek cans üdnek ha trei ügens tho an teylû Pill behatna. 
Jane Pill (trei ügens hy bloodh) o benyn wedhow. Gour hei a 
verwas. Nag era bes dew vab o trigys genjy. William (naw warn 
ügens bloodh) o driver jynn, ha James (etek bloodh) o gov. 
En ogas, gour Thomasine o den bal plobm (martesen en 
Whel Chyverton Nowydh en ogas) ha thera dhe Thomasine 
eth flogh. 
Otta men co Robert Pill en corfflan Lannberan. Ma henwyn 
Selina ha Robert war an keth men co.  Anjei a wrug merwel 
yonk.

Ha Thomasine? Teylû Bawden eth dhe Pow Sows noor dhe bollow glow ha  balyow horn. Gour Thomasine a verwas e'wedh. Hei o golheres ha hei a wobrenas romys dhe ostijy e'wedh. Encledhys ew hei en Barrow in Furness (hedn'ew "Kernow Bian").

No comments:

Post a Comment