Drolla Rag Flehes 1

HAV ASTRANJ

A STRANGE SUMMER

Radn 1. Dalleth Pub Tra Oll

The Start of Everything

“Ma odhom dhebm a olifans gwydn.”

Hodna a veu Jana, hor vy.

“Gwra gofen orth dha dhama wydn.”

Hodna a veu agan dama. Thera hei bes hanter orth hy gosowes. Hanter aral hy attendyans a veu res dhe galetter broas: fatel alja hei gwitha agan broder dhort towla brudnyon tû ha’n gath? Ma dhodho gallos marthys rag nebonan ew bes dew vloodh.

“Rag fra ma fowt dhis olifans gwydn, poran?”

Hedna a veu agan sira, pub pres den für.

“Rag an gwerth olifanjes gwydn en fer scol, en tei. Rag fra ken?”

“Drog ew genam, chil vian, dhe egery dha lagajow, bes nag ew gwerthow olifanjes gwydn rag gwertha olifanjes gwydn.”

Mir trûedhek era dhe Jana.

“Nag ero vy convedhes.”

“Thew olifanjes gwydn taclow nag eus fowt dhe düs, na fella.”

“An taclow henwys atal gen Mabm?”

“Nantei. Jei ’ell boas da lowr, bes na ell tüs cawas ûs veth ragt’anjei.”

“Me ’alja ûsya olifans gwydn.”

“Ma taclow üjy et agan bes eus dhe voas olifanjes gwydn. Thens pernys ha nena boas res dhe ves rag boas gwerthys arta. Thens radn an economy.”

“Bettegens, penag oll a vo anjei, ma odhom dhebm onan anedhans.”

Lebmyn, thera geryow an Tas o seny pecar ha’n re Mabm.

“Gwra gofen orth dha dhama wydn!”